БИШКЕК, 30-мар. — Sputnik. Ишеним грамоталарын тапшыруу салтанатында Кыргызстандын президенти Алмазбек Атамбаев өлкөнүн кандай пландары бар экенин айтты.
Бүгүн тогуз мамлекеттин (Түркмөнстан, Польша, Австралия, Швеция, Пакистан, Алжир, Израиль, Филиппиндер жана Венгрия) элчилери Кыргызстандын президентине ишеним грамоталарын тапшырды.
Президент өз сөзүндө Кыргызстан достук мамилелерди чыңдоо үчүн бардык мамлекеттер менен кызматташууга даяр экенин билдирди. Ошол эле учурда өзүнүн кызыкчылыгы да башкы орунда турарын кошумчалап, быйыл КМШга Кыргызстан төрагалык кыларын белгиледи.
Өлкө башчысы элчилерден көп нерсе көз карынды экенин айтты.
"Бизге Европадагы бир мамлекеттин элчиси дайындалган. Ал бир жыл ичинде эки өлкөнүн мамилелерин абдан жакшыртты. Мен бул мамлекетте болдум. Элчилерден көп нерсе көз каранды. Эгер жумуш ордунда уктай турган болсо бул дагы вариант. Бирок, сиздер мамилелерди чыңдоо үчүн бардык аракеттерди көрөсүздөр", — деди ал.
Өлкө башчысы эки мамлекеттин мамилесинин өнүгүшүндө Түркмөнстандын президенти Гурбангулы Бердимухамедовдун ролун жогору баалады. Ал эми Алжир мамлекети менен экономикалык багытта мамилелерди жолго коюу керектигин айтты.
Президент өз сөзүндө ар бир өлкө менен байланыштарды чыңдап, маданий, экономикалык жактан кызматташуу замандын талабы экенин баса белгиледи.
