БИШКЕК, 28-мар. — Sputnik. Президент Алмазбек Атамбаев бүгүн, 28-мартта Жалал-Абад шаарынын мэри Салайдин Авазовду кабыл алганын өлкө башчынын маалымат кызматы билдирди.
Авазов шаардын суу камсыздоочу системасын жаңылоо чаралары тууралу айтып берди. Бул система ишке кирсе, бардык шаардыктар ичүүчү суу менен камсыз болушат. Мэр ошондой эле канализация системасын толугу менен жаңылоо пландарына да токтолду.
Шаар башчы бюджеттик ачыктыкты камсыз кылуу аркылуу шаар бюджетинини эсебинен социалдык объектилерди куруу жана жолдорду оңдоо көлөмүн кыйла көбөйтүүгө мүмкүн болгонун белгиледи.
Президент Атамбаев мэрге шаарды өнүктүрүүгө багытталган инфраструктуралык долбоорлорду өз маалында жана сапаттуу ишке ашыруу боюнча бир катар тапшырмаларды берди.
