БИШКЕК, 29-мар. — Sputnik. Социалдык тармактарда Үңкүр-Тоо Өзбекстандын аймагы деп таанылган документтин жайылтылышы кезектеги "бекназаровдук провокация" экенин өкмөттүн маалымат кызматы билдирди.
Буга чейин соцтармактарда өкмөт Жалал-Абаддагы Үңкүр-Тоону Өзбекстандын аймагы деп тааныгандыгы тууралуу документ тарап кеткен. Мындан улам андагы "Кербен" телемунарасы башка жерге көчүрүлөт деген маалымат айтылган.
Маалымат кызмат буга чейин кабарлагандай, премьер-министр да, башка мамлекеттик органдардын өкүлдөрү да эч кандай документке кол койгон эмес. Муну менен бирге өкмөт маалыматтык коопсуздукту сактоо жана Аксы, Ала-Бука, Чаткал элин сапаттуу, заманбап санарип электрондук байланыш менен камсыздоо максатында Аксы районунун аймагына кошумча станция куруу чечимин кабыл алган.
Ал эми оппозиция өкүлү Азимбек Бекназаров Sputnik Кыргызстан агенттигине "бийлик аны бардык ыкма менен каралоого аракет кылып жатканын" айтты.
