БИШКЕК, 28-мар. — Sputnik. Үстүбүздөгү жылдын июнь айына карата доллардын баасы 65 сомдон бааланат. Мындай божомолду Sputnik Кыргызстан агенттигине эмгек сиңирген экономист Жумакадыр Акенеев айтып берди.
Доллардын куну эки ай бою 76 сомдун чегинде туруп, февралдан тарта арзандай баштаган. Учурда Бишкектин акча алмаштыруучу жайында чет элдик валютаны 69,8 сомдон сатып алып, 70,1 сомдон сатышууда.
"Бул ички жана тышкы факторлорго байланыштуу. 30-40 пайыз — рубль менен теңгенин бекемделиши, 60-70 пайызы — экономиканын дедолларизациясынан улам сомдун таңсыктыгы", — деди Акенеев.
Анын айтымында, өлкөнүн тарыхында биринчи жолу сом негизги валюта катары пайдаланыла баштады.
"Азыр сом менен жасалган соода келишимдери көбөйдү. Жазгы талаа иштеринин башталышы менен сомго болгон суроо-талап мындан да күчөйт. Менин оюмча, июнда доллардын баасы 65 сомду түзөт. Буга дагы бир себеп — Орус-кыргыз өнүктүрүү фондусунун долларды экономикага багытташы. Бул дагы доллардын арзандашына түрткү болот", — деди эксперт.
Мындан тышкары, доллардын курсуна Улуттук банктын активдүүлүгү да таасир этет. Эгер башкы финансылык мекеме долларды сатып алууну токтотуп койсо, ал мындан да тез арзандайт. Ал эми токтотпой улам сатып ала берсе, курс мындан жогору болот.
