БИШКЕК, 27-мар. — Sputnik. Алдыдагы 2-3 күн ичинде жергиликтүү кеңештерге болгон шайлоонун расмий жыйынтыгы чыга турганын Борбордук шайлоо комиссиясынын төрагасы Туйгунаалы Абдраимов маалымат жыйында билдирди.
Белгилей кетсек, бүгүн Кыргызстандагы алты шаарда жана 22 айыл аймакта жергиликтүү кеңешке шайлоо болду.
"Бул автоматтык урналардан алынган алдын ала жыйынтык. Азыр бюллетендерди кол менен саноо дээрлик аяктап калды. Жакынкы күндөрү протоколдорду алып келишет. Расмий жыйынтык 2-3 күндүн ичинде чыгарылат. Ошондо гана кайсы партия канча мандат ала турганы билинет", —деди Абдраимов.
Ал ошондой эле, шайлоонун жүрүшүндө добуштарда сатып алууга аракеттер болгонун билдирди.
