БИШКЕК, 27-мар. — Sputnik. Борбордук шайлоо комиссиясы жергиликтүү кеңештерге болгон шайлоо кадимки режимде өтөт деп үмүттөнүп жатканын БШКнын төрагасы Туйгунаалы Абдраимов маалымат жыйында билдирди.
Бүгүн Кыргызстанда алты шаарда (Ош, Каракол, Балыкчи, Токмок, Кемин, Майлуу-Суу) жана 22 айыл аймагында жергиликтүү кеңештерге шайлоо өтүүдө.
Абдраимовдун айтымында, шайлоого даярдыктар жакшы көрүлдү.
"Жергиликтүү кеңештер кичинекей болгондуктан алар дүйнө жүзү боюнча парламенттик же президенттик шайлоого караганда оор өтөт. Жалпысынан 456 түрдүү бюллетень чыгарылды. Айрым шайлоо участогунда алардын узундугу 80 сантиметрге чейин жетет. Мисалы Милянфанда 11 орунга 91 талапкер ат салышууда. Ал эми Чаекте 21 орун үчүн 113 киши талапкер болгон", — дейт БШКнын башчысы.
Абдраимов шайлоонун жүрүшүндө айрым маселелер да бар экенин айтты. Мисалы, Оштогу Бабур участогунда 1,5-2 сааттай кишилерди аныктай турчу төрт жабдуу иштебей турган. Айрым жерлерде дагы бузулуп калган жабдуулар катталган. Ошондой эле, автоматтык санай турчу урнаны туура эмес кошуп койгон учурлар да аныкталган.
"Алар оңдолду, азыр бардык жабдуулар иштеп жатат. Саат 10.00гө алынган маалымат боюнча шайлоочулардын 10,6 пайызы катышты. Мисалы, Ош менен Токмокто бул көрсөткүч 12 пайызды түзөт. Шайлоо жакшы өтөт деп ишенебиз", — деди ал.
Белгилей кетсек, жергиликтүү кеңешке жети пайыздык босогону өткөн гана партиялар келет.
