БИШКЕК, 18-мар. — Sputnik. Көл аймагында табылган мамонттун сөөгүн изилдөө үчүн Илимдер академиясынын Тарых жана маданий мурас институтунун окумуштуу адистери сөөк табылган жерди каза башташты. Бул тууралуу өкмөттүн Ысык-Көл облусундагы өкүлчүлүгүнүн маалымат кызматы билдирди.
Буга чейин археология бөлүмүнүн башчысы Кадича Ташбаева баштаган илимпоздор аталган аймакка жөнөп кеткени айтылган. Топтун курамында тарыхчы, археолог, палеонтолог бар.
"Окумуштуулар сөөк табылган жерди изилдеп чыгып, үлгүлөрүн алышты. Учурда казуу иштери улантылып жатат", — деп айтылат билдирүүдө.
Өкмөттүн өкүлү ал жерди тостуруп, милиция кайтарууга алган. Маданият, маалымат жана туризм министрлиги бул боюнча комиссия түзүлүп, сөөк Бишкектеги музейге алып келиниши мүмкүн экенин билдирген.
Россиянын палеонтология институтунун адиси Евгений Мащенко "Көлдүк мамонт" трогонтерий пили же талаа мамонту экенин билдирген.
Ал эми айрым окумуштуулар анын мастодонт экенин болжошууда.
