БИШКЕК, 17-мар — Sputnik. Президент Алмазбек Атамбаев Аксы окуясынын 14-жылдыгы белгилене турган Боспиек айлына барат. Бул туурасында президенттин маалымат кызматы Sputnik Кыргызстан агенттигине билдирди.
Боспиек айылында Аксы окуясынын катышуучулары, райондун аксакалдары, бийлик өкүлдөрү чогулуп куран окулат.
Кыргызстандын тарыхында "Аксы окуясы" деген ат менен белгилүү болгон саясий нааразычылыкка чыккан элге ок атылган кандуу окуяга быйыл 14 жыл толду.
Жалал-Абаддын Аксы районундагы Боспиек айылында болгон бул трагедия Кыргызстандын кийинки саясий турмушунун активдешүүсүнө, коомдук ойгонуусуна жем таштаган окуялардан болуп калган. Коомчулукта бул окуя өлкөдөгү кийинки бир нече олуттуу саясий өзгөрүүлөрдүн жаралышына өбөлгө түзгөндүгүн айтып келишет.
