БИШКЕК, 2-мар. — Sputnik. Жаңы мэрдин башкы милдети — Бишкекти ɵнүккɵн шаарга айлантып, "жашыл шаар" наамын кайтаруу экенин премьер-министр Темир Сариев мэриясынын жамаатына жаңы шаар башчысы Албек Ибраимовду тааныштыруу учурунда билдирди.
Премьер-министр учурда Бишкекте кɵйгɵйлɵр абдан кɵп экенин, мэр шаарга кам кɵрүү милдетин толугу менен ɵзүнɵ алуусу керек экенин белгиледи.
"Кеп шаар кɵчɵлɵрүн жана тротуарларын ирээтке келтирүү, парк жана турак-жай жайгашкан аймактарды жашылдандыруу, транспорттук инфраструктураны ɵнүктүрүү тууралуу жүрүүдɵ. Сиз мурдагы мэр Кубанычбек Кулматов баштап кеткен иштерге жаңы дем берүү менен ал иштерди улантып кетериңизге ишенем. Үстүбүздɵгү жылы борбордо тɵрт чоң иш-чара ɵткɵрүлүшү пландаштырылууда. Буга байланыштуу Бишкек мэриясы шаардын тышкы кɵрүнүшүн тийиштүү түргɵ келтирүү максатында болгон күч-аракетин жумшоосу тийиш", — деди Сариев.
Өкмɵт башчы мэрияга борбор жолдорун оңдоону колго алууну тапшырып, мында велосипедчендер үчүн шартты эске алууну тапшырды.
"Ал үчүн, ɵзгɵчɵ шаар борборунда, кыймыл маршрутун иштеп чыгуу керек. Бул максатка каражаттар бар. Бишкек аймагында жайгашкан ооруканалар, поликлиникалар республикалык бюджеттен каржыланууга ɵттү, ал эми 1,6 миллиард сом кɵлɵмүндɵгү бошотулган каражатты шаар ɵнүгүүсүнɵ калтырдык", — деди премьер-министр.
Сариев быйыл республикалык бюджеттен борбордо беш мектеп курууга каражат бɵлүнɵрүн белгиледи.
