Жалал-Абад облусундагы Кочкор-Ата шаарындагы "Кыргызнефтегаздын" жүздөгөн жумушчулары нааразычылык акциясына чыгып, ишканада орун алган көйгөйдү чечип берүү үчүн өлкө жетекчилеринин келишин талап кылышты.
Алардын айтымында, айрым аткаминерлердин аракеттеринен улам ишкана жапа чегүүдө.
Алардын берген маалыматына ылайык, депутат Рыскелди Момбеков "Кыргызнефтегаз" мамлекетке бир миллиард сомдон ашык чыгым алып келген, ал жакта коррупция гүлдөгөн деп ЖК жыйынында айткан. Андан сырткары ишкананын 11 лицензиянын тогузунун долбоору жок, ал жакты 13 кытайлык компания иштетет деген далилсиз сөздөрдү сүйлөгөн.
Андан сырткары Геология агенттигинин "Кыргызнефтегаз" ишканасы жөнүндө далили жок маалыматтары үчүн Башкы прокуратурага кайрыла турган болушту.
Ноокен районунун Кочкор-Ата шаарындагы "Кыргызнефтегаз" ишканасында 2500 адам иштейт. Бул мекемеде быйыл 80 миң тонна мунай өндүрүлуп, акыркы беш жылда ишкананын кирешеси 6 эсеге көбөйгөн.
"Кыргызнефтегаз" Жалал-Абад, Кочкор-Ата жана Майлуу-Суу шаарларынын калкын көгүлтүр от менен камсыздайт.
