БИШКЕК, 1-мар. — Sputnik. Бүгүн Жалал-Абад облусундагы Кочкор-Ата шаарындагы "Кыргызнефтегаздын" жүздөгөн жумушчулары нааразычылык акциясына чыгып, ишканада орун алган көйгөйдү чечип берүү үчүн өлкө президентинин келишин талап кылышты. Бул тууралуу элдик коргоо комитетинин төрагасынын орун басары Муктар Артыкбаев Sputnik Кыргызстан маалымат агенттигине билдирди.
Белгилей кетсек, "Кыргызнефтегаздын" жүздөгөн жумушчулары жумуш орундарынын кыскарышына, айлык акынын кармалышына жана ишкананы орунсуз текшерүүлөрдүн көбөйгөнүнөн улам митингге чыгышкан. Учурда алар тарап кетишти.
Артыкбаевдин айтымында, ишкана чыгарган мазутун былтырдан бери керектүү көлөмдө сата албай келет.
"Бизде иштетилген нефтинин 54-55 пайызынан мазут чыгат. Ошону сата албай жатабыз. Биз чыгарган продукцияны өкмөттүк ишканалар алчу. Бирок былтыртадан баштап аз алып калды. Ишкана өндүргөн мазуттун баасы базар баасынан жогору болуп жатат. Бизде килограммы 19 сом болсо, базарда 14,5 сомдон сатылууда", — дейт ал.
Андыктан топтолуп турган мазутту базар баасында сатуу үчүн өкмөткө кайрылышканын Артыкбаев кошумчалады.
"Биз мамлекеттик ишкана болгондуктан өз алдынча бааны төмөндөтө албайт экенбиз. Аны өкмөттүн токтому менен гана чечсе болот", — деди комитет төрагасынын орун басары.
Ал ошондой эле, нааразы болгондор көйгөйдү жеринде чечип берүү үчүн президенттин келишин суранышканын белгиледи.
"Буга чейин да өлкө башчысы келип, маселени чечип берген. Бул жолу да келип аны чечип берүүсүн суранабыз", — дейт ал.
Нааразы болгондор президентке, премьер-министрге, Жогорку Кеңештин төрагасына кайрылуу жолдомой болушту.
"Кыргызнефтегаз" ишканасында жалпысынан 2500 кызматкер иштейт. Ал Кочкор-Атадагы эң ири ишкана болуп эсептелет жана Жалал-Абад, Кочкор-Ата, Майлуу-Суу шаарларын газ менен камсыздайт.
