БИШКЕК, 2-мар. — Sputnik. Кыргыздын таланттуу жазуучуларынын бири, драмачы жана киносценарист Мурза Гапаров туурасында "Сулуулуктан – улуулукка. Мурза Гапаров баяны" аттуу китеп жарык көрдү. Китепти профессор жана адабиятчы Абдыкерим Муратов түзгөн.
Ал китепке кирген арноолор, маектер, эсселер, эскерүүлөр, изилдөөлөр, жарыяланбаган чыгармалар кирди. Бул жыйнак окурмандарга, адабиятчыларга Гапаровдун чыгармачылыгын, жеке турмушун дагы тереңирээк түшүнүүгө жардам берет.
"Ал киши тууралуу ар тараптуу айтып берүү бир китептин ичине да сыйбайт, анткени анын тагдыр-таржымалы, чыгармачылык дүйнөсү ушунчалык бай да, ушунчалык көп жактуу. Бул китепти түзүүдөгү максат — ошол көп жактуу дүйнөсүнүн бир четин болсо да колдон келишинче калпып алып, окурмандардын алдына "мына ушундай киши болгон" деп жайып салуу", — деди Муратов.
Мурза Гапаров 1936-жылы 22-мартта Ош облусунун Ноокат районунда туулган. Ал өзүнүн жарым кылымдан бир аз ашыгыраак жашаган өмүрүндө кыргыз окурмандарына бир топ повесттерди, драмаларды, котормолорду тартуулаган. Гапаров 66 жашында катуу оорудан каза болгон.
