БИШКЕК, 27-фев. — Sputnik. Премьер-министр Темир Сариев Бишкек шаарындагы Энвер Гареев атындагы Ботаникалык бакчанын абалы менен таанышып, аны өнүктүрүү боюнча жыйында тиешелүү тараптарга бир катар тапшырмаларды берди.
Сариев аталган бакчанын өлкө жана борбор шаар үчүн мааниси абдан чоңдугун, бирок, анын учурдагы абалы начар экенин белгиледи.
Премьер бул жайды илим изилдөө борбору болуу менен катар шаар тургундарынын сейилдөөчү, ден соолугун чыңдоочу жайга айлантуу зарылдыгын айтты.
Ал бакчанын абалын жакшыртуу үчүн өкмөттүн, Бишкек шаардык мэриясынын жана Билим берүү жана илим министрлигинин биргелешкен аракети зарыл экендигин белгиледи.
Премьер ботаникалык бакчаны өнүктүрүү үчүн алгач, бир катар чечимдерди кабыл алуу керек.
"Эң алгач, учурдагы аймагын сактап, инфраструктурасын жана материалдык-техникалык базасын жакшыртуу, илимий изилдөө жана селекциялык ишмердигин өнүктүрүп, билим берүү жана экологиялык-маданий ишмердигин күчтɵндүрүү зарыл", – деди өкмөт башчысы.
Муну менен катар Ботаникалык бакты өнүктүрүү боюнча атайын концепция иштеп чыгуу жана бул боюнча мекемелер аралык жумушчу топ түзүү тапшырмасын берди. Жумушчу топту вице-премьер-министр Кудайбердиева жетектемей болду.
