БИШКЕК, 24-фев. — Sputnik. Бишкектин Панфилов паркындагы "шайтан дөңгөлөк" алып салынды.
Сейил бактын жетекчиси Дмитрий Петровдун айтымында, дөңгөлөктү эскилиги жеткендиктен алып салууга туура келген.
"Шаарда дагы эки дөңгөлөк бар. Эскисин алса, жаңысын коет. Жаңыланып турганы жакшы да", — деди ал.
Директор жаңы дөңгөлөк боюнча документтер учурда макулдашылып жатканын белгиледи. Андыктан азырынча аттракционду монтаждоого мүмкүн эмес.
"Бардык сырларыбызды ачпай туралы, анткени, жаңы аттракциондун ачылыш аземи болот", — деди Петров.
Азырынча жаңы дөңгөлөктүн бийиктиги 50 метрге жетип, эскисине караганда бир топ чоң болору белгилүү болду. Петровдун айтымында, аталган дөңгөлөк бүгүнкү күндүн талабына толугу менен жооп берип, өлкөнүн эгемендүүлүгүнүн 25 жылдыгына чейин орнотулмакчы.
