БИШКЕК, 19-фев. — Sputnik. Бишкек шаардык кеңештеги "Республика" фракциясынын депутаттары Бишкек шаар мэрине кимди көрсөтүү боюнча өз талапкерин сунуштайт. Бул тууралуу оппозициялык фракциянын башчысы Канатбек Музуралиев Sputnik Кыргызстан маалымат агенттигине билдирди.
Анын айтымында, фракциянын кеч чогулушуна кворумдун жоктугу себеп болгон, андан сырткары саясый кеңештин да жыйыны болушу керек болчу. Азырынча ким талапкер болору так айтыла элек.
"Саат 17.00дө биз фракциянын жыйынын өткөрөбүз. Ал жактан барын талкуулап, чечим кабыл алабыз. Саат 18.00гө чейин талапкерди сунуштаганга үлгүрөбүз", — дейт Музуралиев.
Өкмөттүн маалымат кызматы премьер-министр Темир Сариев бул маселени талкуулай электигин билдирди.
Шаардык кеңештеги төрт фракция, коалиция жана премьер-министр каалаган талапкерин сунуштайт алат.
Шаардык кеңештеги 45 депутаттын эң аз дегенде 23үнүн добушун алган талапкер мэр болот.
Кубанычбек Кулматов 9-февралда өз ыктыяры менен кызматтан кеткен. Анын милдетин вице-мэр Айгүл Рыскулова аткарууда. Мэрди шайлоо 27-февралда өтөт.
