БИШКЕК, 17 фев. — Sputnik. Кыргызстан социал-демократиялык партиясынын Бишкек шаардык кеңешиндеги фракциясы калаа мэрлигине Албек Ибраимовдун талапкерлигин сунуштап жатканын Sputnik Кыргызстан агенттигине фракциянын лидери Лев Васильев билдирди.
Эске салсак, Кубанычбек Кулматов 9-февралда отставкага кеткен. Учурда мэрдин милдетин вице-мэр Айгүл Рыскулова аткарып жатат. Ал эми жаңы мэрди шайлоо 27-февралда өткөрүлөт.
"Бүгүн фракция жыйыны өткөрүлдү. Анда Албек Ибраимовдун талапкерлиги сунушталды. Фракциянын бардык 17 депутаты аны колдоого алды. Бишкек шаардык шайлоо комиссиясына болгон кайрылууга кол коюп бердим", — деп билдирди Васильев.
Анын айтымында, Ибраимовдун өндүрүштүк тармакта тажрыйбасы жогору болгондуктан талапкерлиги колдоого алынды.
"Ал өзүн жакшы жетекчи катары көрсөтө алды", — дейт Васильев.
Өкмөттүн маалымат кызматынын жетекчиси Назира Ахмедова премьер-министр азырынча эч кандай комментарий бере элегин билдирди.
Белгилей кетсек,шаардык кеңештин депутаттарынын көпчүлүк добушуна ээ болгон талапкер жеңүүчү аталат. Ал үчүн 45 депутаттын ичинен 23төн кем эмес добушка ээ болуу керек.
