БИШКЕК, 11-фев. — Sputnik. Кылмыш эч убакта жазасыз калбаш керек. Бул тууралуу президент Алмазбек Атамбаев бүгүн ички иштер министри Мелис Турганбаевди кабыл алуу учурунда билдирди.
Жолугушууда мамлекет башчысы укук тартибин жана коомдук коопсуздукту камсыз кылуу, кылмыштуулук менен күрөштү күчөтүү боюнча жүргүзүлүп жаткан иштер, андан тышкары ички иштер органдарынын ишмердигинин натыйжалуулугун арттыруу чаралары тууралуу маалымат алды.
Турганбаев өлкө башчысын быйылкы жылы өлкөдө өтө турган ири эл аралык иш чараларда коомдук тартипти камсыз кылуу боюнча даярдык иштери менен кабардар кылды.
Атамбаев өлкөдө укук тартибин камсыз кылуу, жарандардын укуктарын жана эркиндигин коргоо боюнча активдүү иштерди улантуу, ошондой эле кылмыш эч убакта жазасыз калбаш керек деген принципти бекем сактоо зарыл экенин баса белгиледи.
