БИШКЕК, 11-фев. — Sputnik. Казакстандын Алматы облусунун полициясы асыл тукум жылкы уурдаган деп шектелген жаранды кармады. Бул тууралуу Новости – Казакстан маалымат агенттиги аймактын ички иштер департаментине шилтеме берүү менен билдирди.
Маалыматка ылайык, 8-февралда Алматы облусунун Карасай райондук полициясына жергиликтүү айыл-чарбанын башчысы кайрылып, 2015-жылы декабрда анын асыл тукум жылкысы (алдын ала маалыматтар боюнча таза кандуу күлүк – ред.) уурдалганын айткан. Ал жазган арызында өз алдынча издөө аракеттери жыйынтык бербегенин билдирген.
"Ыкчам-иликтөө иш-чараларынын жүрүшүндө 37 жаштагы киши жылкыны уурдап союп алганы маалым болду. Далил катары жылкынын териси шектүү жарандын үйүнүн жанындагы аңдан табылган", — деп айтылат полиция тараткан билдирүүдө.
Келтирилген чыгым эки миллион тенге (400 миң сом) деп бааланууда. Мал ууру кармалып, камакка алынды. Учурда тергөө иштери жүрүп жатат.
