БИШКЕК, 9-фев. — Sputnik. Россиянын Екатеринбург жана Новосибирск шаарларында жашаган кыргызстандык жарандардан биометрикалык маалымат чогултуу жараяны жанданганын Тышкы иштер министрлиги билдирди.
Маалыматка ылайык, жеке маалымат кечээтен баштап аталган шаарлардагы өкүлчүлүктөрдө чогултулууда.
"Биометрикалык маалымат күнүгө саат 9.00дөн 18.00гө чейин кабыл алынууда. Кыргызстандык жарандар бул үчүн паспортун (ID card же чет элдик паспорт) көрсөтүүсү жетиштүү болот", — деп айтылат билдирүүдө.
Буга чейин жыл сайын 16 жашка толгон өспүрүмдөр биометрикалык маалыматтарын тапшырып тургандыктан биометрикалык каттоо токтобой турганы айтылган. Бул кадам шайлоочулардын тизмесин жаңыртып турууга гана жардам бербестен, биометрикалык паспорт берүүгө өбөлгө болот.
