БИШКЕК, 1-фев. — Sputnik. Бишкекте СССР Эл артисти, белгилүү бийчи Чолпонбек Базарбаевди эскерүү кечеси өтө турганын Маданият, маалымат жана туризм министрлиги билдирди.
СССР Эл артисти, белгилүү бийчи Чолпонбек Базарбаев.
© Фото / пресс-служба Минкультуры КР
Иш-чара 4-февраль күнү Малдыбаев атындагы кыргыз улуттук академиялык опера жана балет театрында өтөт. Мында Базарбаевдин ысымын алып жүргөн Бишкек хореографиялык училищесинин тарбиялануучулары менен балет артисттеринин биргелешкен концерти болуп, анда дүйнөлүк классиканын номерлери тартууланары айтылууда.
Чолпонбек Базарбаев 1949-жылы 4-февралда Кочкор районунда туулган. Күрөңкөев атындагы музыкалык-хореографиялык окуу жайды аяктагандан кийин Москвадан стажировкадан өтүп, чеберчилигин арттырган. Сахнада СССР Эл артисти Айсулуу Токомбаева менен өнөктөш болгон.
Көзү тирүү болсо залкар инсан быйыл 67 жашка чыкмак. Базарбаев 2002-жылы жол кырсыгынан каза болгон.
