БИШКЕК, 12-янв. — Sputnik. Композитор Рыспай Абдыкадыровду эскерүү Ош шаарындагы Сулайман-Тоонун этегиндеги анын жайындагы эстеликке гүл коюу менен башталып, анын ысымын алып жүргөн облустук филармониядагы иш-чара менен уланды.
Абдыкадыров көзү тирүү болгондо 75 жашка чыкмак. Ал өмүрүнүн акырына чейин Ош шаарында жашап, эмгектенген.
Эскерүүгө композитордун кызы Сюита Абдыкадырова, калаа башчысы Айтмамат Кадырбаев жана өкмөттүн облустагы өкүлү Таалайбек Сарбашев жана ырчынын чыгармачылыгын урматтаган күйөрмандары катышты.
Чогулгандар Абдыкадыровдун кыргыз маданиятын байытуудагы салымын белгилешип, чыгармачылыгын, анын доорун жана устаттык сапаттарын эскеришти.
Ал эми кызы Сюита Абдыкадырова композитордун чыгармалары кыргыз элинин баалуу мурастарынын бири катары кала берерин айтты.
"Атамдын чыгармачылыгы — кыргыз элинин баалуу мурастарынын бири. Анын ырларында кусалыгы, өзгөчө дирилдеген сезимдери берилген. Жан дүйнөсү менен берилип жазган чыгармалары ыр дүйнөсүн барктагандарды кайдыгер калтырбайт", — деди ал.
Филармониянын алдында ырчынын кыргыздын кыйырына кеткен "Сагынуу", "Издейм сени","Алмашым" ырлары жаңырды.
Абдыкадыров 1941-жылы 12-январда Ош облусуна караштуу Кара-Кулжа районунун Кызыл-Булак айылында туулуп. 1994-жылы 12-сентябрда оорудан улам көз жумган.
