БИШКЕК, 27-янв. — Sputnik. Муз жарылып, сууга түшүп кеткен 12 жана 8 жаштагы кыздарды куткарууга аракет кылган Айбек Бактыбеков менен Талант Самарбековго каармандыгы үчүн медаль ыйгаруу маселеси каралып жатканын ӨКМ билдирди.
Маалыматка ылайык, кырсык Панфилов районунун Кайыңды айылында үстүбүздөгү жылдын 12-январында болгон. Кичинекей кыздар көлмөгө жакын жерде чана тээп ойноп жатып, музга түшүшкөн. Жука тоңгон муз жарылып кетип, кыздар сууга түшүп кетишкен.
Көптө барып суудан куткарылган 12 жаштагы кызга бир нече ирет жасалма дем алдыруу жасалган. Тилекке каршы, өспүрүм райондук ооруканадан каза болгон. Ал эми кичинекей кыздын абалы учурда туруктуу экени айтылууда.
Көрсөткөн каармандыктары үчүн Бактыбеков менен Самарбековду ӨКМнын "Чөгүп бара жаткан адамды куткаргандыгы үчүн" медалы менен сыйлоо маселеси каралып жатат.
