БИШКЕК, 27-янв. — Sputnik. Бишкекте кымбат баалуу унаалардын номерин уурдап, ээсин опузалоо менен акча талап кылган кылмыштуу топ кармалганын шаардык ИИБ билдирди.
Маалыматка ылайык, кылмышкерлер унаалардын мамлекеттик номерлерин чыгарып кетип, ордуна акча сала турган "4634318" өздүк эсебин таштап келишкен. Орточо эсеп менен алар унаа ээсинен 100 доллар өлчөмүндө акча талап кылышкан.
Бул факты боюнча Октябрь РИИБ кылмыш ишин козгоп, анын негизинде кылмышка шектүү катары 22 жана 29 жаштагы эки жаран кармалган. Учурда алар убактылуу кармоочу жайга киргизилди. Ушундай эле доомат менен милицияга дагы эки тургундун кайрылганы айтылууда.
Милиция кызматкерлери ушундай кылмыштын курмандыгы болгон жарандарды укук коргоо органдарына кайрылуусун өтүнөт.
