БИШКЕК, 12 янв — Sputnik. Кара-Кече көмүр кенин иштетүүдө экологиялык коопсуздукка басым жасалат. Бул тууралуу вице-премьер Олег Панкратов кенди комплекстүү иштетүү боюнча жыйында билдирген.
Өкмөттүн маалымат кызматы билдиргендей, Панкратов энергетикалык коопсуздукту жогорулатууда кенди ишке киргизүү — эң ири инвестициялык долбоор экенин баса белгилеген.
"Сынакты өткөрүүдө мамлекеттин экономикалык кызыкчылыктарына, экологиялык коопсуздугуна жана жарандарды социалдык жактан колдоого басым жасалат", — деп Панкратов билдирди.
Бардык юридикалык иштер акырына чыккандан кийин инвестициялык сынак өткөрүүгө багытталган документтер өкмөткө жиберилет.
Март айында сынакты жарыялоо пландалып жатат. Сынактын талаптарынын ичине кенди иштетүү андан кийин жылуулук электростанциясын куруу каралган. Станциянын кубаттуулугу 1200 мегаватт башкача айтканда Токтогул ГЭСтин кубаттуулугуна барабар болот.
