БИШКЕК, 12-янв. — Sputnik. Согуш жана чыр-чатактар болуп жаткан 22 өлкөдө 24 миллион бала мектепке барбай калды деп билдирди БУУнун Балдар фондусу.
"Согуш оту тутанган мамлекетте жашаган балдар үй-жайынан, үй-бүлө мүчөлөрүнөн, досторунан айрылып, тартипсиздик менен кооптуулуктун коркунучунда калды. Билим алып, окуганды, санаганды үйрөнүү мүмкүнчүлүгүнөн ажыраган бөбөктөрдүн келечеги туман бойдон турат. Алар эр жеткенде өлкөсүнүн экономикасы жана коомунун өнүгүшү үчүн өз салымын кошо албайт ", — деп билдирди Балдар фондусунун өкүлү Жо Бурнт.
ЮНИСЕФтин маалыматында, Түштүк Судан, Нигерия, Судан жана Афганистан мамлекеттеринде балдардын мектепке бара албай калган көрүнүшү басымдуу болуп жатат.
2015-жылы 200 миң бала Европа Биримдигинен баш паанек сураган. 30 миллионго жакын бөбөктөр согуш кооптуулугунан улам, үй-жайын таштап кетүүгө мажбур болгон. 250 миллиондон ашуун бала согуш оту жанган аймактарда жашап келет.
