БИШКЕК, 29-дек. — Sputnik. Бишкекте арак ичип отурган 22-23 жаштагы кыздардын бычакташуусунан бирөөсү реанимацияда каза болгонун шаардык ИИБ билдирди.
Маалыматка ылайык, үстүбүздөгү жылдын 26-декабрында Бөкөнбаев көчөсүндө жайгашкан үйлөрдүн биринде спирт ичимдиктерин ичип отурган 23 жаштагы Жылдыз менен 46 жаштагы жаранга 22 жаштагы Гүлзада аттуу кыз келип кошулат.
Бир аздан кийин эки кыздын ортосунда уруш чыгып, эркек киши аларды тынчтандырууга аракет кылат. Эшикте тамеки тартып, 10 мүнөттөн кийин келсе Гүлзада Жылдызды бычактап салганын көрөт.
Ооруканага жеткирилген жабырлануучу реанимацияда эсине келбей каза болгон.
Учурда Ленин райондук ИИБ тергөө иштерин жүргүзүп, натыйжада 22 жаштагы Гүлзада кармалганы белгилүү болду.
