БИШКЕК, 26-дек. — Sputnik. Айыл чарба жана мелиорация министрлиги Талас облусунун дыйкандарына картошка менен буурчактын бир түрү болгон нокот өстүрүүгө чакырууда. Бул тууралуу аталган мекеме тарабынан облуста фермерлер үчүн өткөрүлгөн семинарда белгилүү болду.
Маалыматка ылайык, окууларга 400дөй адам катышкан. Иш-чарада жергиликтүү дыйкандарга Евразиялык экономикалык биримдикке кирген өлкөлөрдүн суроо-талабын жараткан картошка, бакча өсүмдүктөрү, жер-жемиш өстүрүү сунушталды.
Мындан тышкары, кайрак жерде жакшы өсө турган буурчактын түрү болгон нокот өстүрүп көрүү айтылды. Адистер бул азыкка Орто Азия аймагын жердеген элдин суроо-талабы дайым болорун белгилешти.
Семинарлар Талас облусунун бардык райондорунда өттү. Буга чейин мындай иш-чаралар Чүй облусун камтыган.
