БИШКЕК, 24-дек. — Sputnik. Россия гидроэлектр станциянын Жогорку Нарын каскадын жана Камбар-Ата гидроэлектрстанциясын куруу боюнча макулдашууну аткара албай турганы көрүнүп турат, деп билдирди президент Алмазбек Атамбаев жыл жыйынтыгын чыгаруучу маалымат жыйында.
Анын айтымында, Россия алган милдеттемелерин объективдүү себептерден улам ишке ашыра албай жатат.
"Россиянын учурдагы экономикасынын абалы аталган макулдашууну аткара албай турганын далилдеп турат. Бул жерде Россияны да күнөөлөө болбойт. Кыргызстан бул макулдашуудан чыгып, башка инвестор издеши керек окшойт. Абалга көз салып турабыз, бирок кээ бир учурда кескин чечимдерди кабыл алууга туура келет", — деди өлкө башчы.
Атамбаев маалымат каражаттары мындан кандайдыр бир саясий боек издей башташы мүмкүн экенин айтты.
"Путин — реалист, ал баарын көрүп турат. Бул мен үчүн да аябай өкүнүчтүү нерсе. Кийинки жылы Жогорку Нарын каскады ишке кирерине абдан ишеним арткам. Биздин да күнөөбүз бар, Россиянын болуп-толуп турган кезинде жер бөлүп берүү маселесин кечеңдетип койдук. Каскаддын курулушун күтүп отура албайбыз. Мен Владимир Владимировичке башка инвестор издей турганыбызды айттым. Туура кабыл алды. Мисалы, "Камбар-Ата-1" долбоорун эч ким да карап көргөн эмес. "Русгидрону" Евгений Дод башкарып турганда аракеттер бар болчу. Мен көпкө чейин созулган курулушту жаман көрөм, Путин мени түшүндү. Бул жерде эч кандай саясат жок", — деди Атамбаев.
Жогорку Нарын каскадынын курулушу суу-энергетикалык объектилерди куруу үчүн Нарын облусунда жер бөлүп берүүдөгү кыйынчылыктардан улам токтоп калган.
Жогорку Нарын каскадына гидроэлектрстанцияларды куруу Кыргызстан менен Россия өкмөттөрүнүн ортосундагы 2012-жылдын 20-сентябрында макулдашууга жетишилген.
