БИШКЕК, 22-дек. — Sputnik. Президент Алмазбек Атамбаев Россияга болгон иш сапарынын алкагында өлкө башчы Владимир Путин менен жолукканын мамлекет жетекчисинин маалымат кызматы билдирди.
Путин Атамбаевди жылуу тосуп алып, эки тараптуу мамилелер ар убак көңүл чордонунда экенин белгиледи.
"Биз достук мамилелерибизди улантуунун үстүндө иштешибиз керек. Байма бай жолугуп, пикир алмашууга мүмкүнчүлүк кеңири", — деди Россия президенти.
Атамбаев өз кезегинде эки тараптуу макулдашууларды дагы бир ирет талкуулап алууга шарт түзүлгөнүнө кубанычта экенин белгилеп, жаңы жыл алдында эки элге тынччылык, бакубаттуулук каалады.
Жолугушуунун жүрүшүндө президенттер биргелешкен долбоорлордун ишке ашуусун ортого салышты.
