БИШКЕК, 17-дек. — Sputnik. Россиянын экономикасы экономикалык кризистин оор учурунан өттү. Бул тууралуу Россиянын президенти Владимир Путин жыл сайын өтүүчү маалымат жыйында билдирди.
Анын айтымында, кийинки жылдын экинчи кварталынан тарта өлкөнүн экономикасы ишенимдүү түрдө өр алат.
"Май айынан тарта чыгарылган продукциялардын көлөмү артат. Приморье крайында өндүрүштүн өсүшү байкалып, көмүр казып алуу көбөйгөн. Жумушсуздардын саны 5,6 пайыздын деңгээлинде. Менин сөзүмдү соода балансындагы оң сальдо далилдейт", — деди орус президенти.
Путин өлкөнүн 364,4 миллиард доллар көлөмүндөгү эл аралык валюталык резерви бар экенин кошумчалады. 2014-жылга салыштырмалуу сырткы карыз 13 пайызга төмөндөгөн.
"Биз бардык эл аралык уюмдардын алдындагы карыздарды толугу менен төлөп жатабыз", — деди Путин.
Россиянын учурдагы бюджетинин тартыштыгы 957 миллиард рублди түзөт. Өлкө башчы 2015-жылдын жыйынтыгы менен мамлекеттик бюджеттин тартыштыгы болжонгондон 3 пайызга аз болорун белгиледи.
