БИШКЕК, 17-дек. — Sputnik. Биз Түркия менен кызматташуудан баш тарткан эмеспиз, анан эле Су-24 учагынын окуясы болуп кетти, деди Россиянын президенти Владимир Путин жыл сайын өтүүчү маалымат жыйында.
Анын айтымында, Түркия менен болгон кырдаал акылга сыйбас чекке жетти.
"Макул, болору болуптур. Телефон чалып бир ооз сүйлөшүп коюуга болот эле да, дароо Брюсселге чуркап жөнөбөй. Алар да, НАТО да мындай жаңжалдын кереги жок экенин айтышты", — деди Путин.
Президент Антальяда өткөн акыркы жолугушуунун күн тартибинде Түркия үчүн өтө кооптуу маселелер коюлганын, Россия аларды чечип жардам берүүгө макул дегенин айтты.
"Телефон аркылуу же аскердик каналдар аркылуу маселени чечүүгө болот эле да. Эмне жөнүндө ойлонушканы белгисиз. Бизди ал жактан качып жөнөйт дештиби? Биз антип кача турган мамлекет эмеспиз. Биз контингентибизди кеңейттик", — деди өлкө башчы.
Путин түрк эли менен достук мамилелер сакталып калышы керек экенин, бирок учурдагы расмий бийлик менен сүйлөшүү ишке ашпай турганын белгиледи.
"Түркиянын мындай оома исламынан Ата Түрк көрүндө өкүрүп атса керек", — деди президент.
Путин Су-24 учагы Түркияга нефть жеткирүүнүн коопсуздугун камсыздоо максатында атып түшүрүлгөн деп айтууга толук негиз бар экенин маалымдаган.
