БИШКЕК, 16-дек. — Sputnik. Өкмөттүн токтому менен кыска мөөнөттүү бала бакчалардын штаты бекитилгенин Билим берүү жана илим министрлиги билдирди.
Маалыматка ылайык, токтомдо үч сааттык бала бакчанын бир тайпасында иштей турган жамааттын штаты берилген.
Мектепке чейин билим берүүчү жайлардын жетишсиздигинен улам 2003-жылдан баштап бала бакчанын альтернативалуу түрү болгон жамааттык жана үч сааттык бала бакчалар түзүлө баштаган. Мындай аракет көп балдарды мектепке чейин билим алуу менен камсыздайт.
Министрлик 2016-жылы 100 вариативдүү бала бакча ачыларын белгиледи.
