Билдирүүгө ылайык, алданып кулчулукка туш болгон кыргызстандыктар тууралуу маалыматты текшерүү максатында Россиядагы КРдин элчилиги аталган шаарга барып, иштин чоо-жайын териштирген.
Алдын ала маалымат боюнча, өзүн Чыныгүл деп тааныштырган кыргызстандык аял 14 мекендешин чогултуп, жол киресин төлөп, Ковров шаарына тигүү фабрикасында иштеткени алып келген. Аларга айына 80-90 миң рубль айлык алары айтылган.
Териштирүү маалында ишкананын администратору жарандар келери менен паспортун алып, бир тараптуу жасалма келишим түзгөнү маалым болду. Салык төлөмү катары ар бир жумушчудан ай сайын 5 миң рублден акча алынып турган. Мындан тышкары, эмгек абдан төмөн бааланып, айына болгону 7-8 миң рублге иштеп келишкен. Тигүүчүлөр цехтин жанындагы бөлмөдөн тамактанып, нымдуу, жашоого ылайыкташпаган жайда күн көрүп келишкен. Үч үй-бүлө бир бөлмөгө коюлган үч чоң керебетке түнөшчү.
Учурда аталган факты боюнча чогултулган материалдар ИИБ тарабынан каттоого алынып, иликтөө иштери жүрүп жатат.
