БИШКЕК, 18-ноя. — Sputnik. Молдовадагы кесиптештер Sputnik Кыргызстан Эл аралык агенттиги жана радиосу баштаган поэзия эстафетасын аягына чыгарды.
Алыкул Осмоновдун 100 жылдыгына арналган долбоор редакция тарабынан 2015-жылдын март айында башталган. Ага мамлекеттик бийлик өкүлдөрү, белгилүү өнөрпоздор жана коомдук ишмерлер катышкан.
Премьер-министр Темир Сариев эстафетаны улантып, Осмоновдун "Ким болсом" деген чыгармасын окуп берүү менен кезекти Молдовага узаткан.
Бул өлкөдө чыгармаларды Молдованын Эл артисти Константин Москович, Гагаузия аймактык билим берүү бөлүмүнүн башчысы Ирина Влах, Славян университетинин ректору Татьяна Млечко жана искусство чебери Эрий Хармелин окушту. Видеороликтер Sputnik Молдова сайтынын орус жана молдова тилдеринде жарыяланды.
Кесиптештер эстафета таягын Sputnik Абхазия жана Sputnik Түштүк Осетия редакцияларына тапшырды.
"Аталган долбоор Молдовада чоң кызыгууну жаратты. Музыканттар, окумуштуулар, театр ишмерлери, коомдук лидерлер демилгени жигердүү колдоого алышты. Биз эстафетаны Абхазия менен Түштүк Осетиядагы кесиптештерибизге узатып, долбоор ал жакта да чоң ийгиликке жетишет деген ишеничтебиз", — деди Sputnik Молдова агенттигинин жетекчиси Владимир Новосадюк.
Sputnik (sputniknews.com) — мультимедиалык маалымат хабы. Анын өкүлчүлүгү ондогон ашык мамлекетте бар. Sputnik мультимедиалык хабы өзүнө сайттарды, радиоуктурууларды, мобилдик тиркемени камтыйт. Андан сырткары, социалдык тармактарда баракчалары бар. Sputnik агенттиги дүйнөдө болуп жаткан окуяларды дүйнөнүн отуздан ашык тилинде маалымдайт.
