БИШКЕК, 16-ноя. — Sputnik. Жарадар болгон үч адам ооруканада көз жумгандан кийин Париждеги терактыдан курман болгондордун саны 132 адамга жетти деп билдирет Франс Пресс агенттиги.
Мурдараак каза болгондордун саны 129, ал эми жаракат алгандар 352 адам деп кабарланган эле.
Жума күнү 13-ноябрда Парижде бир нече террористтик аракеттер жасалып, белгисиз адамдар ресторандардын биринде ок чыгарган. Ал эми Франция менен Германиянын футбол боюнча топтору ойноп жаткан "Стад де Франс" стадионуна жакын жерде үч жардыруу болгон. Оюнду көрүүчүлөрдүн арасында француз президенти Франсуа Олланд бар болчу. Андан тышкары, рок-концерт жүрүп жаткан "Батаклан" театрында эл барымтага алынган.
