БИШКЕК, 14-ноя. — Sputnik. Энергетикалык холдингдин түзүлүшү аталган тармактагы коррупциялык көрүнүштөрдү азайтууга өбөлгө боло турганын вице-премьер Олег Панкратов холдинг түзүүгө арналган жыйында билдирди.
Өкмөттүн жаңы түзүмүнө ылайык, Энергетика жана өнөр жай министрлиги жоюлуп, анын ордуна улуттук холдинг түзүү каралган.
Панкратовдун айтымында, энергетикалык холдинг мамлекеттин энергетикалык комплексин башкаруу жана өнүктүрүү боюнча жападан жалгыз оператор болмокчу.
"Холдингди түзүү боюнча иш-чаралардын планы иштелип чыкты. Бул аракетти тездетүү керек, анткени энергетика — бул стратегиялык тармак", — деди вице-премьер.
Атка минер уюштуруу иштери 2016-жылдын 1-январына чейин аякташы керектигин белгилеп, энергетикалык холдингдин түзүлүшү коррупциялык көрүнүштөрдү азайтууга жана мамлекеттин энергетикалык коопсуздугун камсыздоого багытталган долбоорлорду ишке ашырууга өбөлгө болорун белгиледи.
