БИШКЕК, 13-ноя. — Sputnik. Айыл чарба тармагын колдоого арналган насыяларды дыйкан фермерлер жеңил шартта алышы керектигин премьер-министр Темир Сариев
Кыргыз-орус өнүктүрүү фондунан айыл чарба тармагын колдоо боюнча жумушчу жыйында билдирди.
Сариев Кыргыз-орус өнүктүрүү фондунан айыл чарба тармагын колдоого багытталган насыяларды калыс жана жеткиликтүү бөлүштүрүү маанилүү экенин белгилеп, бул жааттагы ишти күчөтүү зарылчылыгы турганын билдирди.
"Бул насыяларга суроо-талап абдан чоң. Бирок калк арасында жетиштүү деңгээлде түшүндүрүү иштери жүргүзүлбөй жатат. Насыя берүүнү тездетүү иштерин күчөтүү керек", — деди өкмөт башчы.
Премьер-министр аталган банктардын жетекчилери айыл чарба тармагын колдоо жана кардарларга сапаттуу кызмат көрсөтүү боюнча башкаларга үлгү болушу керектигин билдирди.
Муну менен катар Сариев Кыргыз-орус өнүктүрүү фондунан каржыланган насыялардын жарандарга жеткиликтүүлүгүн камсыз кылуу үчүн аз өлчөмдөгү насыяларды микрокредиттик компаниялар аркылуу берүү жолун караштырып көрүүнү тапшырды.
