БИШКЕК, 10-ноя. — Sputnik. Мамлекеттик ипотека компаниясы жакын арада насыя берүүнү башташы керектигин вице-премьер Олег Панкратов "Жеткиликтүү турак-жай 2015-2020" мамлекеттик программасын ишке ашырууга арналган жыйында билдирди.
Анын айтымында, учурда коммерциялык банктар аркылуу ипотекалык насыя берүүнү камсыздоону жөнгө сала турган звенону түзүү зарыл.
"Турак жайга муктаж миңдеген мекендештерибиз социалдык ипотеканын иштешин күтүп жатат. Биз аларды жер каратууга акыбыз жок", — деди вице-премьер.
Жолугушуунун соңу менен Панкратов бир катар тапшырмаларды берип, аталган программаны тез арада ишке ашыруу үчүн Жогорку Кеңештен тийиштүү мыйзам долбоорлорун биринчи кезекте кароону өтүндү.
