БИШКЕК, 9-ноя. — Sputnik. Советтик архитектурасыз кыргыз архитектурасын элестетүү мүмкүн эмес жана ал тарыхта өзүнүн изин калтырды, аны жокко чыгара албайбыз. Мындай пикирин "Кыргызреставрация" илимий изилдөө институтунун директору Жумамедель Иманкулов Sputnik агенттигине билдирди.
Анын айтымында, мурдагы СССРдин курамындагы мамлекеттердин ичинен Кыргызстан гана Улуу октябрь революциясынын күнүн белгилейт. Мындай аракеттер кыргызстандыктар тарыхый маданиятты аздектерин айгинелеп турат дейт Иманкулов.
"Биздин мамилебиз толеранттуу. Албетте, Кыргызстандын аймагында Советтер Союзунан калган эстеликтерге кайдыгер мамиле бар. Бирок, алардын бардыгы акчанын тартыштыгынан улам болууда. Республикалык маанидеги эстеликтер бүгүнкү күнгө чейин Кыргызстандын сыймыгы болуп келет", — деди ал.
Иманкулов ошондой эле, Абдылас Малдыбаев атындагы опера жана балет театрынын, Конституциялык палатанын, мэриянын, Кыргызстандагы эл аралык университеттин, Улуттук банктын, Темир жол вокзалынын имараттары жана башкалар советтик классиканын үлгүсү катары бааланып, мамлекет тарабынан корголорун айтты. Советтик архитектуранын үлгүлөрү Кыргызстандын дээрлик бардык аймактарында бар.
"Көңүл коюп карасаңар советтик элементтер кыргыз символдору менен сонун айкалышып турганын байкоого болот. Көпчүлүк эксперттер бул дүйнөлүк архитектурада болгон чоң арыш экенин айтып жүрүшөт", — дейт Иманкулов.
Архитектор жаштар Кыргызстандын тарыхын биле жүрүүсү керектигин баса белгилейт. Анын ичинен СССР доорунда салынган архитектуралык имараттар тарыхтын пайдубалдары экенин, ансыз Кыргызстандын тарыхын элестетүү кыйындыгын айтат.
