БИШКЕК, 27-окт. — Sputnik. АКШнын Лос-Анжелес шаарында өтүп жаткан Азия киносунун Эл аралык кинофестивалында Мирлан Абдыкалыковдун "Сүтак" жана Далмира Тилепбергенованын "Асман алдында" тасмалары көрсөтүлө турганын Кинематография департаменти билдирди.
Фестиваль 26-октябрь күнү башталган. "Сүтак" конкурстук программага киргизилип, 29-октябрь жана 1-ноябрь күнү көпчүлүктүн сынына коюлат. Тасманы аталган фестивалдын негиздөөчүсү жана төрагасы, продюсер Садык Шер-Нияз тааныштырып, көрөрмандардын суроолоруна жооп берет.
Биринчи ирет өтүп жаткан Азия киносунун фестивалына Камбоджа, Вьетнам, Япония, Афганистан, Непал, Россия, Палестина, Ирак, Иордания, БАЭ, Түркия, Ливан, Бангладеш, Малайзия, Мьянма, Монголия сыяктуу мамлекеттерден 28 тасма катышууда.
Эскерте кетсек, Абдыкалыковдун "Сүтак" тасмасы "Оскар" киносыйлыгынын узун тизмесине киргизилген. Мындан тышкары, бүгүн, 27-октябрда саат кечки жетиде тасма Москва шаарында "Киношок" фестивалынын алкагында жеңүүчү тасма катары көрсөтүлөт.
