БИШКЕК, 27-окт. — Sputnik. Ысык-Ата районунда жубайын сабап өлтүрдү деп шек менен 52 жаштагы жаран кармалганын Чүй ОИИБ билдирди.
Милициянын маалыматы боюнча каза болгон аял үстүбүздөгү жылдын 3-сентябрында үйдөн чыгып дайынсыз кеткен. Эки жумадан кийин кызы милицияга энесинин жоголуп кеткендиги тууралуу арыз менен кайрылган. Аялдын күйөөсүнүн айтымында, жубайлар уруша кеткенден кийин кожейке чыгып кетип, ошол боюнча келген эмес.
Бир айдан ашуун убакытка созулган издөө иштеринин натыйжасында, 23-октябрь күнү Ивановка айылынан үч чакырым алыстыкта арыктын ичинен адамдын сөөктөрү табылган. Кийин анын кийим-кечесинен изделип жаткан аял экенин анын кызы тааныган.
Бул боюнча кылмыш иши козголуп, анын натыйжасында аялдын күйөөсү кармалды. Учурда ал убактылуу кармоочу жайга киргизилип, иштин чоо-жайы аныкталууда.
Тергөө амалдары жүрүп жатат.
