БИШКЕК, 24-окт. — Sputnik. Премьер-министр Темир Сариев стандарташтыруу жана метрология кызматкерлерин кесиптик майрамы менен куттуктады. Бул тууралуу өкмөттүн маалымат кызматы билдирди.
Сариев алдыда эң чоң жумуштар турганын, ал ийгиликтүү иштерден ата мекендик өндүрүштүн өсүү тездиги, анын экономикалык өсүүсү жана рыноктогу атаандаштыкка жөндөмдүүлүгү көз каранды экенин белгиледи.
"Эл аралык, Европалык, жана аймактык стандартташтыруу, метрология боюнча уюмдардын иштерине активдүү катышуу эл аралык аренада биздин кадыр баркыбыздын жогорулоосуна алып келип, республикага алдыңкы тажрыйбаларды улуттук кызыкчылыктарга пайдаланууга соодадагы техникалык тоскоолдуктарды азайтууга, кыргыз продукциясына болгон ишенимди бекемдөөгө көмөктөшөт", — деди ал.
Келечектеги милдеттердин бири — эл аралык уюмдардын ишиндеги ролун жогорулатуу жана ага катышууну мындан ары кеңейтүү экенин өкмөт башчы баса белгиледи.
"Жакынкы мезгилде Метрикалык конвенциянын толук укуктуу катышуучусу болуу менен биздин улуттук эталондорду эл аралык деңгээлде толук масштабда таанууга жетишүүбүз керек", — дейт Сариев.
Өз эмгектерин, билимдерин биздин жалпы ишибизге жумшап жаткан бардык адистерди бүгүнкү Кыргызстандарттын мааракеси менен, Стандартташтыруу күнү менен чын жүрөктөн куттуктайм деп айтылат өкмөт башчынын сөзүндө.
