БИШКЕК, 24-окт. — Sputnik. Жергиликтүү бийлик күчтүү болсо, өлкө күчтүү болот. Бул тууралуу президент Алмазбек Атамбаев жергиликтүү жамааттар күнүнө карата куттуктоо сөзүндө билдирди.
Анын айтымында, элдин бийликке, мамлекетке болгон ишеними жергиликтүү өз алдынча башкарууга жараша болот. Президент аларда элдин турмушундагы маанилүү маселелерди чечүүгө жөндөмдүү болгон олуттуу күч бар экенин белгилеп, элдин көйгөйү менен жакшы тааныш экенин айтып өттү.
"Биз жергиликтүү өз алдынча башкарууну бекемдөөгө, анын финансылык мүмкүндүктөрүн кеңейтүүгө тийишпиз. Жергиликтүү бийлик күчтүү болсо, өлкө күчтүү болот!", — деди өлкө башчы.
Атамбаев аталган тармакта бир катар кыйынчылыктар бар экенин кошумчалады.
"Тилекке каршы жергиликтүү өз алдынча башкаруу органдары өздөрү мыйзамдарды бузган жана карапайым жарандардын укуктарын сактабаган учурлар кездешет. Өз алдынча башкаруу – өзүм билемдик эмес. Бул нерсени түп-тамырынан бери өзгөртүү керек. Адамдар ар бириңерди элге күнүмдүк маселелерин чечүүгө жардам берүүгө милдеттүү, мыйзамды катуу сактаган мамлекеттин өкүлү деп билүүгө тийиш", — деди президент.
Мамлекет жетекчиси кубаттуу, өнүккөн Кыргызстанды куруу эң башкы максат экенин белгилеп, бул иште жергиликтүү өз алдынча башкаруунун кызматкерлери олуттуу милдет өтөй турганын билдирди.
Атамбаев куттуктоосунун аягында жергиликтүү жамаат өкүлдөрүнө чың ден-соолук, бак-таалай жана Кыргызстандын келечеги үчүн жасап жаткан жооптуу иште ийгиликтерди каалады.
