БИШКЕК, 24-окт. — Sputnik. Ар бир кыргызстандыктын тагдырында Бишкек шаарынын өзүнчө орду бар экенин президент Алмазбек Атамбаев борбор калаанын күнүнө карата куттуктоосунда билдирди.
Быйыл Кыргызстандын борбору Бишкек шаары өзүнүн 137-туулган күнү өткөрүп жатат.
Президент шаардыктарды Бишкекке болгон сүйүү жана кооз, заманбап борбордо жашоого умтулуу бириктирип турганын белгилеп, калаанын ардагерлери жана азыркы учурда шаарда жашап, эмгектенип жаткандардын бардыгы Бишкектин башкы байлыгы экенин кошумчалады.
"Бийликтин негизги милдети – адамдар үчүн борбордо ыңгайлуу жашоо шарттарын түзүп, коопсуздукту камсыз кылуу. Биздин шаарыбыз инвесторлор үчүн, бизнести жүргүзүү үчүн ыңгайлуу болушу керек. Бүгүнкү күндө энергетикалык, коммуналдык жана транспорттук инфраструктураны жакшыртуу, көчөлөрдү, короолорду, парктарды жана сейил бактарды көрктөндүрүү боюнча масштабдуу иштер жасалууда. Бул максатта мамлекет көптөгөн каражат бөлүп жатат. Жаңы мектептер, социалдык-маданий объекттер курулууда. Бирок шаардыктардын өздөрүнө, алардын маданияттуулугуна жана тарбиясына дагы көп нерсе байланыштуу", — деди Атамбаев.
Өлкө башчы эгемендик жылдары Бишкек, өлкө сыяктуу эле көп кыйынчылыктарды башынан кечиргенин айтып, тургундардын чыдамкайлыгы жана эрктүүлүгү менен бул сыноолордон өтүп, борбор калаа меймандос жана кең пейил шаар боюнча калганын белгиледи.
"Мен Кыргызстандын жана анын борбору – Бишкектин келечеги кең экендигине терең ишенем!", — деди президент.
Куттуктоосунун аягында мамлекет башчы Бишкек шаарына бакубаттыкты, тынчтыкты жана гүлдөп өнүгүүнү, ал эми шаар тургундарына чың ден-соолук, бак-таалай жана ийгиликтерди каалады.
