БИШКЕК, 23-окт. — Sputnik. 2017-жылга карата Кыргызстандын бардык жарандарына биометрикалык паспорт берилерин биринчи вице-премьер Тайырбек Сарпашев электрондук колдоо боюнча донорлордун координациялык жыйынында билдирди.
Анын айтымында, учурда биометрикалык системаны мындан ары да колдонуу боюнча жол картасы иштелип чыгууда.
"2016-жылдын экинчи жарымынан баштап биометрикалык паспортторду чыгара баштайбыз. Кийинки 2017-жылы өткөрүлө турган президенттик шайлоого карата Кыргызстандын бардык жарандары биометрикалык паспортко ээ болот. Бул шайлоо күнү жарандарды идентификациялоо процедурасын жеңилдетүүгө шарт түзөт", — деди Сарпашев.
Атка минер ыплас технологияларды колдонуу артта калганын баса белгиледи.
"Эми шайлоо барган сайын ачык-айкын болот. Биз бюллетендерди массалык түрдө урнага салуу жана "айлампа" ыкмаларын жок кылдык деп ишенимдүү айта алам. Учурда бир гана көйгөй калды — бул добуштарды сатып алуу. Азырынча адамзат муну менен күрөшүүнү жолун таба элек. Эгер окумуштуулар мындай ыкманы чыгарса биз аны да алууга даярбыз", — деди ал.
Учурда Бишкек шаарында жарандардан биометрикалык маалымат кабыл алуу иши жанданып, борбор калаада 11 атайын пункт иш алып барууда. 26-октябрдан баштап мындай жайлар республиканын бардык аймагында ачылат.
