Террористтик топту жок кылууда курман болгон милиция кызматкери эскерилди

БИШКЕК, 21-окт. — Sputnik. Милициянын кенже лейтенанты Нурланбек Сайдиевдин жаркын элесине арналган ички иштер кызматкерлеринин арасында Жалал-Абад облустук ИИБ демилгеси менен кичи динамиада өттү.

Ага жалпысынан алты команда катышып, спорттун алты түрүнөн (кичи футбол, гира, кол күрөш, ок атуу, ордо, аркан тартыш) беттеш жүрдү.

Мелдешке Баткен, Ош облустарынын жана шаарларынын ички иштер башкармалыктары, ИИМдин түштүк аймагы боюнча күзөт башкармалыгы, ИИМдин түштүк аймактык атайын багыттагы полку катышты. 

Милициянын кенже лейтенанты Нурланбек Сайдиев 2004-жылдын 21-ноябрында Ош шаарында террористтик топтун мүчөсүн кармоо учурунда курман болгон. 2005-жылдан баштап ИИМ жыл сайын анын элесине арналган иш-чараларды өткөрүп келет.

Жалал-Абад облустук ИИБдин башчысы Жеӊиш Жоробековдун айтымында бул кесиптик даярдыкка да өзүнүн оң таасирин берет.

"Бул мелдештин арты менен кесиптик күжүрмөн даярдыгыбызды, өз ара ынтымак жана биримдигибизди чыӊалтуу, жалпы милициянын кадыр баркын көтөрө алабыз", — деди Жоробеков.

Мелдештин жыйынтыгында, 1-орунду Ош облустук ИИБ, 2-орунду Жалал-Абад облустук ИИБ, ал эми 3-орунду ИИМдин Атайын багыттагы полку ээледи.

ИИМдин күжүрмөн кесиптик дене тарбия башкармалыгынын башчысы милициянын полковниги Бакыт Матмусаев кийинки жылы кичи динамиаданы Баткен аймагында өтө тургандыгын маалымдады.