БИШКЕК, 14-окт. — Sputnik. "Ислам мамлекети" өз башчыларынын бири жана иерархиялык жактан экинчи турган лидери өлгөнүн ырастады деп билдирет Франс Пресс агенттиги.
Августта АКШ "Ислам мамлекетинин" ээлеген орду боюнча экинчи лидери Ирактын Мосул аймагында жок кылынганы туурасында билдирген эле.
"Америка Абу Мутаз аль-Курашинин өлүмүнө кубанып, муну өзүнүн эң чоң жеңиши деп атап жатат", — деген ИМдин экстремисттик сайттардын биринен алынган сөздөрүн келтирет агенттик.
"Ислам мамлекети" террористтик тобу бүгүнкү күндө дүйнөнүн башкы коркунучтарынын бири болуп эсептелет. Үч жыл ичинде террористтер Ирак менен Сириянын көпчүлүк жерлерин басып алышкан. Ошондой эле алар өз таасирин Түндүк Африкада, тагыраак айтканда, Ливияда жайылтуу аракетин көрүп жатат. Алардын басып алган жерлеринин жалпы көлөмү 90 миң чарчы чакырымга жеткени, ал аймактарда согушкерлер халифат жарыялап, өз мыйзамдарын жана бийлигин орноткону маалымат каражаттарында байма-бай айтылып келет. Мүчөлөрүнүн саны 50 миңден 200 миңге жетет деп болжолдонууда.
