БИШКЕК, 13-окт. — Sputnik. Майлуу-Суу шаарынын мэрине 14-октябрда өтө турган шайлоо талапкерлердин жоктугунунан болбой калды деп билдиришти БШКдан Sputnik маалымат агенттигине.
"Эч талапкер жок болгондуктан, шайлоо өтпөй калды. Бизге аймактык шайлоо комиссиясынын чечими келип түшө элек",— деди БШКнын өкүлү.
Ал эми БШКнын мүчөсү Жеңиш Акматов мэрди шайлоо күнү көпкө созулбай эле кайра дайындала тургандыгын айтты.
"БШК мүчөлөрү карап чыгып, кайра өтө турган мөөнөтүн аныктайт. Катталгыла деп дагы бир-эки жумага жылдырабыз. Азыркы мэр келерки жылга чейин эле шайланат, себеби анда кайра эле жергиликтүү кеңештерге шайлоо болот", — деди Акматов.
Шаар мэрлерин шайлоо мөөнөтү жергиликтүү шаардык кеңештердин убактысы менен бирдей. Жергиликтүү кеңештерге келерки шайлоо 2016-жылы өтөт.
