БИШКЕК, 13-окт. — Sputnik. Жол кайгуул кызматы (ЖКК) Бишкектин борбордук көчөлөрү бир тараптуу болгондон кийин алгачкы үч күнү эреже бузган айдоочуларга айып пул салбай турганын Sputnik агенттигине аталган мекеменин маалымат катчысы Тилек Оторов билдирди.
Мындан бир ай мурун мэрия Бишкектин айрым көчөлөрүн 15-октябрдан тарта бир тараптуу кыймылга өткөрүү чечимин кабыл алган.
Ага ылайык, Киев көчөсү Жаш Гвардия бульварынан Абдырахманов көчөсүнө чейин чыгышты карай бир тараптуу болот. Мында коомдук унаа үчүн эки тараптуу багыт сакталат.
Москва жана Токтогул көчөлөрү мурдагыдай эле коомдук транспорттон башка кыймыл үчүн бир тараптуу боюнча калат.
Мындай тартип киргизилгенден кийин Чүй проспектинде жол кыймылына коюлган кечкисин чектөө алынат.
Оторовдун айтымында, алгачкы үч күнү кезметтеги инспекторлор аталган көчөлөрдө эреже бузган айдоочулар арасында түшүндүрүү иштерин жүргүзөт.
Үч күндөн кийин административдик тартипке ылайык, жол эрежесин бузгандарга айып пул салынат. Учурда тийиштүү жол белгилери орнотулууда.
