БИШКЕК, 6-окт.— Sputnik. Жогорку Кеңешке жаңы келе тургандардын арасында премьерлик оюндарды ойной тургандар аз, бирок министрлер кабинети толугу менен өзгөрүшү мүмкүндүгүн тарых илимдеринин кандидаты, Кыргызстандагы Эл аралык университеттин этнология институтунун директору жана саясат таануучу Табылды Акеров билдирди.
Жекшемби күнү Кыргызстанда парламенттик шайлоо болуп, анда 14 саясий партия ат салышкан. Алдын ала алынган маалыматтар боюнча, парламентке алты партия келет. Алардын катарында мурдагы төрт премьер-министр бар.
Саясат таануучунун айтымында, бийлик учурдагы премьер-министрдин президентке болгон жакындыгын эске алып, аны сактап калганга аракет кылат.
"Мурдагы премьер-министрлердин ичинен жалгыз гана Бабанов өкмөт башчы болууга ашыгышы мүмкүн. Себеби ал реванш алуу үчүн мурдагы кызмат ордуна барууга далалаттанат. Бирок президент азыркы премьер-министр Темир Сариевди сактап калууга аракет кылат. Анткени ал активдүү иштеп, президенттин жүргүзгөн саясатына каршы чыкпай келет", —деди Акеров.
Ал ошондой эле, министрлер кабинети толук алмашуусу мүмкүндүгүн айтты. Себеби, жаңы депутаттар шайлоо өнөктөштүгүндө катуу чуркап иштеп, бирок парламентке келбей калган талапкерлерге өз "ыраазычылыгын" билдириши керек.
"Бул министрлер кабинетинин иштешине терс таасир тийгизгени менен, коалициянын амбицияларын канааттандырат", — деди Акеров.
Өкмөт башчынын тез-тез алмашуусу, албетте, жакшы эмес. Бирок парламенттик башкарууга ээ башка мамлекеттердин тажрыйбасын карай турган болсок, бул кадимки эле көрүнүш деди саясат таануучу.
